وصلة ردح

كنت قاعد فى كافيتيريا الشركه ( إن صح القول وسميناها كافيتيريا بزبالتها بريحتها بدبانها بسلطاتها ببا غنوجها ) كان فيه شوية عيال من كذا محافظه من العمال بيردحوا لبعض وانا قاعد سمعت بقى الوصله دى ووصلتها ليكم هنا (مش بنشر غسيل شركتنا الوسخ ) لألألأ ده أنا بس بحاول أفهمكم قد إيه الفلاح المصرى شخصيه عايزه الحرق بجاز وسخ صاااااااااحى...
منوفى لبنى سويفى : يا محافظه وسخه ياللى ردمتوا البحر بالتبن علشان تعدوا .
غرباوى مدافعا : ما إنوا اللى إتظبطتوا فى دنشواى ولا نسيتوا .
المنوفى رادا للهجمه الغرباويه : مش أحسن من السادات اللى ظبطكوا وكنتوا عاوزين تبقوا رجاله وتعملو جمهورية زفتى وتستقولوا وكتمكم كتمة العدس .
البنى سويفى مدافعا عن الغرباوى : مش احسن من البلد اللى رمو فى البحر زيت سخن علشان يقلوا السمك .
الغرباوى متهكما : ههههههههه وقال مسميين نفسهم الارض الطاهره قاااااااااال .
المنوفى مستبسلا : ياض يا هفق منك له إحنا بلدنا بتطلع قاده إنتوا شوية بهايم وكلافين وإن كنت داخل بنى سويف وقف ...... زى السيف .
البنى سويفى : يلا يا منوفى .. المنوفى لا يلوفى ولو وكلته لحم كتوفى .
الغرباوى للمنوفى : مش إنت ياض اللى شدو جدك زى الجاموسه فى الملاس ( المكان اللذى تربط فيه البهيمه حتى تدور فى الساقيه بشكل دائرى مستمر ) .
المنوفى : يعنى إيه ملاس ده ؟
البنى سوفى : مش ده المهم... المهم يعنى إيه جاموسه ؟ هههههههههههه .
واحد من المنصوره ياعينى دخل فى الحوار : كلكم على الواد ولا إيه (_قاصده على المنوفى ) أصل إنت هفق ولولاش هفق ما كنش العيال دى إستفردت بيك .
البنى سويفى : إيييييييييه يا منصورة يا بلد الزحاليق .
بتاع المنصوره (الدقهلاوى ) : إيه بلد الزحاليق دى ؟
الغرباوى : مش عارف بلد الزحاليق؟؟؟!!! مش بلدكم يلا أولها مصنع صابون وآخرها مصنع لبن ....ههههههههههههههههه.
أومال الواد الجيزاوى الندل القوزعه اللى هناك ده بيكتب إيه إنت جاسوس ياض ولا إيييييييييه ؟؟؟؟؟!!
إهجموا على الجااااااسووس .
أنا : أخ دول نقرونى وانا بكتب اللى بقولوه رحنا فى داهيه .
وشششششششششششششش ( نأسف لقطع الإرسال لأن المراسل قد مات فى حادث أليم حيث دهسه قطار منوفى غرباوى بنى سويفى ( بتاع المصوره فرفور معمليش حاجه ) .