نظرية الخُرم

نظرية الخرم

في البداية
وخلوا بالكوا من الكلمتين دول
دي مش نظرية ولا حاجة
لاني لا بالعلم ولا بالخبرة الكافية اللي تخليني أقول نظريات والكلام الكبير ده
ممكن يكون ليا نظرة، إنما نظرية لسه شوية

ندخل بقى في الخرم، أقصد موضوع الخرم

تخيلوا معايا كده بس من غير ماتغمضوا عينيكوا
كيس بلاستيك كبير، مليان مياه
ودبوس صغير وقعدنا نخرم بيه الكيس البلاستيك ده كذا مرة
ايه اللي هيحصل
المياه هتنزل من كل الاخرام دي
بس هتنزل بالراحة لان كل خرم هو خرم صغير
طيب خليكوا معايا
وتخيلوا برضه ان اللي ماسك الكيس هيحاول يسد الاخرام
هنا بقى نيجي لموضوعنا
لان فيه حد هيمسك خرم واحد بس ويحاول يقفله، وكل مايشيل ايده الخرم هينزل مياه تاني
وواحد تاني هيحاول يسد كل الاخرام في نفس ذات الوقت
فمش هيعرف يعمل حاجة ويزهق ويرمي الكيس كله
كده أو كده احنا هدفنا هو المحافظة على أكبر قدر من المياه اللي في الكيس
صح؟
يبقى المفروض اننا نمسك خرم خرم ونحاول نعالجه
بس واحنا بنعمل كده ماننساش ان لسه في اخرام كتير غيره
ولو مالحقناش المياه هتخرج من باقي الاخرام
يعني نعالجه واحنا عايزين نلحق نعالج الباقي

حاجة تاني بقى
مادام هدفنا أصلاً المحافظة على المياه اللي جوه الخرم
يبقى لازم نوسع نطاق تفكيرنا شوية
ممكن نجيب كيس بلاستيك تاني ونحط فيه الكيس الأولاني
ممكن نجيب جردل مثلاً
والحاجة الأهم
ليه بتخرم الكيس البلاستيك من الأول
هو كل ماأقول حاجة تعملها كده على طول من غير تفكير ؟



المصطلحات المستخدمة
الكيس البلاستيك = طريقة تفكيرنا
المياه = عقلنا وأفكارنا ومهاراتنا اللي نمتلكها وممكن نكون مش مقدرين قيمتها
الدبوس = المؤثرات الخارجية السلبية
الخرم = تأثير المؤثرات السلبية علينا
أنا = اللي كتبت الموضوع ده
انت = هتسيب تعليق على الموضوع وهتعمل انفيت للفريندز بتوعك، صح ؟ هههههههههه